Síðustu ár hefur ungu fullorðnu fötluðu fólki staðið til boða að taka þátt í sumarfríi að hætti Reykjadals undir heitinu Vinahópar Reykjadals.

Hver vinahópur hittist að vori og skipuleggur fríið sitt í sameiningu – velur áfangastað, mótar dagskrá og setur saman matseðil. Dvölin er fjórar nætur á tímabilinu júlí til september. Markmiðið er að efla öll í hópnum til að taka þátt í undirbúningi og ákvörðunum, styrkja tengsl og skapa rými þar sem ungt fullorðið fólk getur tilheyrt, ræktað vináttu og notið þess að upplifa frí sem það mótaði saman. 

Sumarfrí Vinahópa Reykjadals er háð styrkveitingum ár hvert. Undanfarin ár hefur verkefnið notið stuðnings frá Félags- og vinnumarkaðsráðuneytinu. Þegar fjármögnun liggur fyrir opnum við fyrir umsóknir, kynnum verkefnið á samfélagsmiðlum og auglýsum eftir þátttakendum.

Árið 2025 var fullt af eftirminnilegum augnablikum. Vinahópar Reykjadals ferðuðust saman, upplifðu ný ævintýri og styrktu tengsl sem lifa áfram langt út fyrir ferðina sjálfa. Myndirnar tala sínu máli.