Starfsemi Reykjadals

Gló hefur um áratugaskeið skapað vettvang þar sem fötluð börn og ungmenni fá tækifæri til þátttöku í tómstundum og til að tilheyra vinasamfélagi. Reykjadalur býður upp sumarbúðir og vetrardvalir þar sem gleði, ævintýri og þátttaka eru í forgrunni.

Vinátta og ævintýri í Gló Reykjadal

Hlutverk okkar er að skapa vettvang þar sem fötluð börn og ungmenni:

fá raunveruleg tækifæri til þátttöku í tómstundum og til að tilheyra vinasamfélagi.
eiga val um að fara í sumarbúðir og upplifa jákvætt og uppbyggjandi sumarfrí með jafningjum.
fá stuðning frá öflugu og hugmyndaríku starfsfólki sem leggur metnað sinn í að gera hverja dvöl einstaka og skapa aðstæður þar sem allir geta tekið þátt í samveru og leik á eigin forsendum.

Samkvæmt Barnasáttmála Sameinuðu þjóðanna eiga öll börn rétt á leik, hvíld og menningu – og það er kjarninn í starfi Gló Reykjadals. Að eignast vini á jafningjagrundvelli og taka þátt í fjölbreyttri og valdeflandi afþreyingu er órjúfanlegur hluti af markmiðum okkar.

Gildin okkar móta allt starf Gló Reykjadals – frá undirbúningi, fræðslu og verkferlum starfsfólks til dvalar, samskipta og skipulagningar dagskrár fyrir gesti.

Gildin okkar:

Vinátta

Ævintýri

Virðing

Öryggi

Leiðarljós Gló:

Tækifæri í stað takmarkana!

Hvað meinum við með því?

Við leggjum áherslu á mikilvægi þess að tilheyra og taka þátt í lífinu af innlifun. Þátttaka og þroski eru samofin og háð áhuga og getu en þó ekki síður tækifærum í umhverfinu. Öll börn og ungmenni þurfa að fá tækifæri til að eignast félaga, efla heilsuna og eigið sjálfstæði, þroska hæfileika sína og færni en umfram allt að nýta það sem í þeim býr til að hafa gaman, njóta lífsins og leggja sitt af mörkum. Tækifæri til þátttöku felast í viðhorfum, aðgengi að stuðningi og viðeigandi aðlögun umhverfis. Tækifærin felast ennfremur í því að takmarka ekki hvernig hlutir eru framkvæmdir, hafa leyfi til að vera ólík og fá að taka þátt hver á sinn máta.