Gló ungmennaráð er vettvangur fyrir fötluð börn og ungmenni til að hafa áhrif á starfsemi Gló og stöðu fatlaðra barna og ungmenna á Íslandi. Ráðið er ráðgefandi fyrir Gló stuðningsfélag, Gló Æfingastöð og Gló Reykjadal.

Í ráðinu sitja fötluð börn og ungmenni sem koma saman mánaðarlega til að ræða hugmyndir, koma á framfæri sjónarmiðum sínum og leggja til lausnir sem geta bætt þjónustu, starfsemi og upplifun þátttakenda hjá Gló.

Gló ungmennaráð vinnur einnig að fjölbreyttum verkefnum sem efla vitund um réttindi fatlaðra barna og ungmenna, með sérstakri áherslu á þátttöku, samráð og aðgengi að tómstundum. Fulltrúar ráðsins taka þátt í fundum, ráðstefnum og öðrum viðburðum þar sem málefni fatlaðra barna og ungmenna eru til umræðu og tryggja að rödd þeirra heyrist þar sem ákvarðanir eru teknar.
 

Við viljum stækka hópinn! 

Við leitum að fleiri börnum og ungmennum sem vilja taka þátt í starfinu með okkur og vera afl til breytinga. Starfsfólk Reykjadals er til staðar á fundunum og hvetur félagið öll að taka þátt óháð stuðningsþörf. 

Ert þú iðkandi hjá Gló Æfingastöð og/eða gestur í Reykjadal? Þá hvetjum við þig til að skrá þig í Gló ungmennaráð. Skráning fer fram með því að senda tölvupóst á reykjadalur@glofelag.is. 

Við hlökkum til að heyra frá þér!